Alltaf tilefni til að skemmta sér...

Síðasta föstudag kláruðum við, Kirsty og Rhys, bestu vinir mínir hér fyrsta uppkastið að lokaverkefnum okkar. Er það ekki kjörið tilefni til að lyfta sér aðeins upp? Ég held nú það. Byrjuðum í eldhúsinu mínu í smá drykk, litaþemað hérna á stúdentagörðunum er frekar spes, ákváðum að nýta okkur það í smá myndatöku. Held bara að þessi bleiki litur sé fínn bakgrunnur...svo ekki sé minnst á þegar maður sjálfur klæðir sig í stíl.

Nú er það bara þessi helgi sem fer í að klára lokaverkefnið og þá fer þetta að verða búið bara.


Tútúlú!

Nýjir strigaskór - víííúúúú!

Jæja, nú fer að líða að lokum hjá mér,það er því lítið að frétta af mér. Helstu fréttir eru að ég keypti mér þessa agalega sætu Puma skó um helgina. Ég ætla að skila uppkasti að lokaverkefninu mínu á föstudaginn þannig að þessi vika verður busy busy. Annars er ég bara hress og kát.

Íslendingakvöld

Í síðustu viku bauð ég þremur íslendingum sem eru hérna í skólanum í mat, ekki seinna vænna að koma smá íslendingastemningu í gang svona undir lokin. ætli þetta verði ekki fyrsta og síðasta svona samkunda á meðan ég er hér. Þetta voru þau Bjarki og Linda, parið í efri ferningunum og svo hann Hilmar. Það var voða skemmtilegt hjá okkur og matur kvöldsins var af mexíkósku bergi brotinn, rosa gott auðvitað. Núna erum við (aðllega þau samt) að plana flutninga á dótinu okkar heim, voða sniðugt, þau plana og ég kem dótinu mínu til næsta bæjar þaðan sem það fer til Íslands. Alveg ótrúlegt hvað manni tekst að sanka að sér af dóti án þess að taka eftir því...fyrr en maður þarf að fara flytja það milli landa.

Bæ í bili

Heimkoma ákveðin - víííúúúú!

Jæja, þá er búið að staðfesta heimkomu mína, 11.september sem er doldið skemmtilegt því ef ég man rétt þá flaug ég út 11.september í fyrra - 1 ár í útlandinu er alveg passlegt fyrir mig í bili. Núna er ég því aðeins að byrja að þreifa fyrir mér í sambandi við vinnu og fæ vonandi e-ð skemmtilegt að gera fljótlega eftir að ég kem heim.

Fyrst ætla ég samt að sýna henni Kirsty minni, sem er búin að vera í aðalhlutverki ásamt mér á þessari síðu, landið mitt. Vei, hlakka ekkert smá mikið til! Já, hún kemur 12.sept og verður í 10 daga, og ég ætla held ég bara að sýna henni allt! Svo líður vonandi ekki allt of langt þar til ég get 'skroppið' til Mósambík og Suður-Afríku til að heimsækja hana, spennó!

Bauð 3 vinum mínum í indverskan mat til mín á lau. heppnaðist rosa vel en var samt nokkuð tvísýnt á tímabili. Ég fór nefnilega svolítið fram úr mér þegar ég var að plana hvað ég ætlaði að elda og ákvað að gera lambakjötsrétt, rækjurétt, grænmetisrétt og baunarétt, og ef þið kunnið að telja þá eru þetta 4 réttir. Svo þegar allt var í full swing á eldavélinni þá rann upp fyrir mér að með hrísgrjónum voru þetta 5 réttir...eldavélin auðvitað ekki með nema 4 hellur. Argh...einn potturinn beint inn í ofn til að halda heitu og reddað þannig en út af öllum hamaganginum tókst mér auðvitað að brenna mig á 4 puttum, klassískt. Maturinn komst á borðið að lokum og allir ánægðir (og einn brenndur), svo var eins og gefur að skilja afgangur í 4 máltíðir í viðbót. Ég lykta líka eins og sannur indverji þessa dagana - eins og laukur!*

*Í þennan mat fóru samtals 10 laukar

Kveðja

Önd - tilraun í eldhúsinu

Já, ég eldaði önd í fyrsta sinn í gær - á kínverska vísu. Það var kínversk kona sem gaf mér kryddblöndu fyrir önd og ég varð að slá til. Þegar ég fór svo að kynna mér hvernig maður færi að við að elda kínverska 'crispy duck' féllust mér næstum hendur, ferlið fól meðal annars í sér að hengja dýrið upp á annan endann í 6 klst. Svo eftir því sem ég velti þessu meira fyrir mér langaði mig meira að prófa svo ég sló loksins til í gær, tók meira að segja mynd af öndinni hangandi en ég á eftir að hlaða henni inn á tölvuna, þið sjáið hana síðar. Öndin bragðaðist svo bara asskoti vel og aldrei að vita nema ég geri þetta einhvern tíma aftur. Fyrir utan húsið mitt er stór tjörn og verð ég að viðurkenna að mér fannst pínku spes að horfa út á endurnar meðan ég verkaði kvöldmatinn frænda þeirra í eldhúsinu mínu. Sú saga gengur reyndar hér að einhverjir kínverskir nemendur hafi í fyrravetur tekið sig til og veitt eitt stykki önd á téðri tjörn og verið reknir úr skólanum fyrir vikið, en eitthvað fer þó tvennum sögum af sannleiksgildi þessarar sögu.

Svo fékk ég pakka fullan af íslensku nammi í þokkabót - ekkert smá glöð - alls konar gott, appollo lakkrís, hjúplakkrís, Freyju draum, djúpur og lakkrísreimar. Tókuð þið eftir hvað allt þetta nammi á sameiginlegt, jú, það inniheldur lakkrís, e-ð sem ekki er auðvelt að komast yfir hér í Englandi, allavega ekki í 'okkar' gæðaflokki.

Ég hitti svo leiðbeinanda minn í morgun og við erum sammála um að lokaverkefnið mitt gangi bara vel, svei mér þá...það er kannski þess vegna sem ég sit á bókasafninu og er að blogga í staðinn fyrir að læra, hmmm.... best að koma sér aftur að verki.

tútúlú

Afmælisgleði

Á síðasta föstudag hélt Kirsty mín upp á afmælið sitt, 24 ára. Byrjuðum á að fara með liðið út að borða og svo á dansiklúbb, rosa fjör alveg. Það voru alveg nokkrir gestir en eftir að hafa skoðað myndirnar komst ég að þeirri niðurstöðu að við vorum eiginlega sætastar í partýinu þannig að ég læt þessa mynd duga. Morguninn eftir dreif ég mig svo til Manchester þar sem ég fór með ollý og fleirum á Sigur Rósar tónleika. Þeir eru rosa duglegir að búa til svona tónlist, en satt að segja sofnaði ég aðeins á tónleikunum, úps. Ég held ég sé bara ekki með nógu þroskaðan heila fyrir svona artí músik, en það voru samt 2 lög sem mér fannst rosa flott þannig að kannski er ekki öll von úti. tútúlú

Mér finnst Indverskur matur góður

Bekkjarfélagi minn hann Bikram Singh er frá Indlandi og var svo skemmtilegur að bjóða mér í mat síðasta laugardag. Þetta var eins og að fara á indverskt veitingahús bara, nammi nammi góður matur. Síðan er hann svo heppinn að í eldhúsinu/borðstofunni hans er sjónvarp þannig að við horfðum á Live 8 tónleikana sem voru í London. Það var barasta mjög skemmtilegt hjá okkur. Hápunktur tónleikanna var að mínu mati þegar Pink Floyd spiluðu en ég hef hingað til ekki talið mig til aðdáenda, ætli það megi ekki segja að það hafi breyst, allavega oggu pons.